"ҚАЙРАТТЫҢ КӨЗІ КӨРМЕЙДІ ЕКЕН ДЕГЕН СӨЗ ЖАЛҒАН", - ДЕЙДІ АНАСЫ ӘРІ ПРОДЮСЕРІ ГҮЛЗИРА АЙДАРБЕКОВА
05.07.2012, 12.24 | |
Қазақ эстрадасы жұлдыздарының бірі, танымал әнші Қайрат Нұртас жөнінде кейінгі кезде ел ішінде түрлі қауесет әңгімелер өршіп тұр. Бір айтқыштар «Қайраттың көзі көрмей қалыпты», – десе, екіншілері тіпті оның жол апатынан қаза тапқаны жөнінде сөз қылуда. Әдетте жақсының соңынан сөз еретіні бар. Демек, бұл да соның бірі демеске лаж жоқ. Бірақ сонда да мұндай сөздер қайдан шығып жүр? Оған не себеп? Біз осындай сұрақтарды Қайраттың анасы әрі продюсері Гүлзира Айдарбековаға қойған едік. – Қайраттың көзі көрмейді екен, көзілдірік киіп жүргені содан көрінеді дегенді жиі естиміз. Бұл сөздер рас па? – Осыдан бес-алты ай бұрын әуежайға асығып бара жатқан кезінде жол апатына ұшырағаны рас. Апат кезінде оның «Джип» көлігі алты рет аударылған. Көліктің быт-шыты шығып, мүлде жарамсыз күйге түсті. Ал Қайрат көлік аударылған кезде қалай екені белгісіз, терезеден шығып кетіпті. Әйтеуір, өзі аман. Дегенмен апат салдарынан басына зақым тиді. Миы шайқалған. Содан ба, кейінгі кезде ұлымда тез ашуланатын мінез қалыптасты. Ұмытшақтығы бар. Бірақ көлік апатынан соң көзінің айналасында тыртық қалды. Ұлым соны ел-жұрттан жасыру үшін ғана көзіне көзілдірік киіп жүр. Біреулердің Қайраттың көзі көрмейді екен деп жүргендері жалған. Оның кішкентай кезінен бері көру қабілеті ойдағыдай. – Ал қазір денсаулығы жақсы ма? – Шүкір, жаман емес. Көңіл-күйі жоғары. Жол апатынан соң Қытайға барып оншақты күн емделіп қайтты. Одан кейін Дубайда демалды. Қазір астында «темір тұлпары» бар, ең соңғы үлгідегі «Мерседес» көлігін мініп жүр. – Жақында шетелдерде өткен концерттер жөнінде айтсаңыз. – Ұлым денсаулығы түзелген соң Монғолия, Қытай, Өзбекстан және Қырғызстанда өнер көрсетті. Монғолияның Баян – Өлгей аймағында 16 күн бойы концерт берді. Қытайда да бірнеше күн болып қайттық. Қарақалпақстанда жиналған жұрт стадионға сыймай қалды. Жұрттың ықыласы өте жоғары. Мен анасы әрі продюсері ретінде осыған қатты қуанамын. – Қайратты таяу күндері Мәскеуде концерт береді деп естідік... – Иә, ол рас. 27-ші мамырда Мәскеуде концерт өтпекші. Оны 7,5 мың адам тамашаламақ. Кеште Қайраттың бұрынғы әндерімен қатар, соңғы кезде жазылған жаңа әндері де орындалады. – Ал Мәскеуден кейінгі жоспар қандай? – Осыған дейін талай рет Ақтау және Атырау қалаларындағы тыңдармандардан өтініштер көп түскен еді. Сондықтан Мәскеуден оралған соң батысқа жол жүрмекпіз. Алла жазса, маусым айының басында Ақтау мен Атырауда ән кеші өтеді деп отырмыз. – Қайраттың орындауындағы жаңа әндер жөнінде не айтасыз? – Соңғы кезде Қайрат төрт-бес ән жаздырды. Бірақ әзірге атын атамай қоя тұрайын. Сондай-ақ Бақыт Алтай екеуі «Ойлама» атты клипке түсті. Одан кейін «Ол сен емес» атты клип шығарды. – Ел-жұртты сүйікті әншісінің жеке өмірі де қызықтырары сөзсіз. Ұлыңыздың отбасы жөнінде не айтасыз? – Ол енді айтылмайтын әңгіме... Сондықтан құпия қалдырайық. – Жақында ғаламтордан Қайрат түскен бір бейнероликті көрдік. Шынымызды айтсақ, көріп отырып сенер-сенбесімізді білмедік... – Сіздің не айтпақ болғаныңызды жақсы түсініп отырмын. Бейнеролик Қайрат Жүсіпбек Елебеков атындағы эстрада және цирк колледжінің 1-ші курсында оқып жүргенінде түсірілген. Бірде Серікбол деген досы ұлымның әдейі ашуын келтіріп, неше түрлі ұят сөздер айтуға мәжбүр еткен. Сосын онысын қызық болсын дегендей телефонына түсіріп алған. Бірақ кейіннен неге екенін кім білсін, ғаламторға жариялап жіберіпті. Серікболдың мұндағы түпкі себебі қызғаныш екені даусыз. Бұл оның Қайратты елге масқара ету үшін әдейі, қасақана жасаған әрекеті. – Қазір екеуінің ара-қатынастары қандай? – Бүгінде араласпайды. Жаңағы сорақылықтан соң қайтіп аралассын? Қайрат Серікболдан ғаламтордағы бейнероликтің қалай пайда болғаны жөнінде сұраса, анау өзінің қалта телефонын жоғалтып алғанын, сондықтан оны өзге біреулердің қасақана жариялап жіберуі мүмкін екенін айтыпты. Мұнысы енді өтірік, досына әдейі қара күйе жағу мақсатында жасағаны анық көрініп тұр. Шын дос деген осылай ете ме екен? Мен де Қайратты жақтап тұрғаным жоқ. Бірақ менің балам да пенде, өзгелер секілді ашуланады. Жұрт сияқты кезі келгенде түрлі сөздер айтуы да мүмкін. Бірақ турасын айтқанда, кімнің кім екенін халық жақсы біледі. Төбеде бір Құдай тұр. Досының мұндай адамгершілікке жат әрекеті ұлымды бәрібір ел-жұртына жексұрын ете алмайды. ...Біз Қайрат Нұртастың жеке өміріне қатысты ғаламтордан деректер іздеген едік. Сонда тапқанымыз мынау. Қайрат 1989 жылы 25-ші ақпанда Түркістанда дүниеге келген. Әкесі Нұртас еліміздегі ірі кәсіпкерлердің бірі. Анасының есімі продюсер ретінде жұртқа жақсы таныс. Әнші ата-анасымен бірге Астанада тұрады. Ол отбасының тұңғышы, өзінен кейінгі Аян, Заңғардың ағасы. Әншінің Алматыда жеке пәтері бар. Ал 2007 жылы отбасын құрған. Келіншегінің есімі – Жұлдыз. Екеуі Сезім, Алау және Нарұл атты ұл-қыздардың ата-анасы. | |
| |
Просмотров: 4112 | Загрузок: 0 | |
Всего комментариев: 0 | |